प्रकाश आंबेडकर, ओवेसींचे जागा वाटपाचे घोडे अडले!

प्रकाश आंबेडकर, ओवेसींचे जागा वाटपाचे घोडे अडले!

बेधडक महाराष्ट्र online न्युज 

मुंबईः भारिप बहुजन महासंघाचे राष्ट्रीय अध्यक्ष प्रकाश आंबेडकर यांनी बहुजन वंचित आघाडी स्थापन करुन इतर राजकीय पक्षांना आव्हान दिले आहे. काँग्रेस सोबत आघाडी करुन 12 जागा पदरात पाडण्यासाठी आंबेडकर वाट बघत आहेत. परंतु काँग्रेसने उत्तर न दिल्यामुळे आंबेडकर, ओवेसींचे जागा वाटपाचे घोडे अडले आहे. यावरुन दोन्ही पक्षातील कार्यकर्ते संभ्रमावस्थेत पडले आहे.

लोकसभा निवडणुका अवघ्या तीन महिन्यांवर येऊन ठेपल्या आहेत. सर्वच राजकीय पक्षांची जागा वाटपावरुन खलबते सुरु आहेत. आंबेडकर हे काँग्रेस सोबत जाण्यास तयार आहेत. त्यांनी 12 जागांचा प्रस्ताव काँग्रेस आघाडीकडे दिलेला आहे. मध्यंतरी अशोक चव्हाण, माणिकराव ठाकरे, विरोधी पक्षनेते राधाकृष्ण विखे पाटील आणि आंबेडकर यांच्यात बैठकही झाली. काँग्रेस किती जागा सोडणार हे अद्यापही आंबेडकर यांना स्पष्टपणे सांगितले नाही. आंबेडकरांनी काँग्रेस सोबत राहावे ही काँग्रेस नेत्यांची इच्छा आहे. आंबेडकर वारंवार काँग्रेस सोबत जाण्यास तयार असल्याचे सांगत आहेत. ओवेसी आणि आंबेडकर यांच्या सभांना चांगली गर्दीही होत आहे. एमआयएम जागा वाटपासाठी आतूरतेने वाट बघत आहे.

तेलंगणा निवडणुकीनंतर जागा वाटप करण्यात येतील असं एमआयएमचे आमदार इम्तियाज जलिल यांनी काही दिवसांपूर्वीच सांगितलं होतं. मात्र आंबेडकर पुढाकार घेण्यासाठी सध्या तरी तयार नसल्याने एमआयएममध्ये आंबेडकरांच्या भूमिकेवर संशय निर्माण झाला आहे.

काँग्रेसला आंबेडकरांचा 12 जागांचा प्रस्ताव मान्य नाही. काँग्रेस,राष्ट्रवादीमध्ये लोकसभेच्या 48 जागांपैकी 40 जागांवर प्राथमिक चर्चाही झाली आहे. इतर आठ जागा या मित्रपक्षांसाठी त्यांनी ठेवल्या आहेत. आंबेडकर दिल्लीत नेत्यांच्या निरोपाची वाट बघत आहेत. मात्र काँग्रेसने जास्त महत्व न दिल्यामुळे चर्चेच गु-हाळ सध्या तरी थांबलेलं आहे.

आम्ही आजही काँग्रेस सोबत जाण्यास तयार

भारिपचा काँग्रेसकडे 12 जागांचा प्रस्ताव आहे. काँग्रेसच्या वरिष्ठ नेत्यांनी आमच्या सोबत चर्चा करायला पाहिजे. आम्हाला सन्मानपूर्वक जागा दिल्या तर आम्ही काँग्रेस सोबत आघाडी करु; अशी माहिती भारिप बहुजन महासंघांचे प्रदेश महासचिव अमित भुईगळ यांनी प्रहार वेब टीमशी बोलतांना दिली.